Madaxweyne Trump oo loo qaaday cisbitaalka

General Health

Madaxweynaha Mareykanka Donald Trump ayaa cisbitaal oo qaaday wax ka yar 24 saacadood kadib markii laga helay cudurka coronavirus.

Aqalka Cad ayaa sheegay in go’aanka loogu qaadayo Xarunta Caafimaadka Milatariga ee Walter Reed “laga qaatay” taxaddar fara badan “.

Mr Trump – oo qandho qabay – ayaa sheegay subaxnimadii hore ee Jimcaha isaga iyo marwada koowaad Melania Trump in laga helay Covid-19.

Aqalka Cad ayaa sheegay inuu dareemayo “daal laakiin niyaddiisu ay aad u sarrayso” uuna la kulmayo astaamo khafiif ah.

Warkan ayaa imanaya bil uun ka hor doorashada madaxtinimada, halkaas oo uu ku wajihi doono Joe Biden oo ka tartamaya xisbiga Dimuqraadiga.

Isagoo xidhan maaskaraha wejiga iyo suud madaw ayuu, Mr Trump wuxuu socod ku maray barxadda Aqalka Cad galabnimadii Jimcaha xilli uu ku sii socday helikabtarta, Marine One, oo ugu qaadaysay safarka gaaban dhankaa iyo cisbitaalka.

Wuxuu u gacan haadiyay wariyeyaasha laakiin waxba ma uu odhan inta aanu diyaaradda fuulin.

Muuqaal uu soo dhigay bartiisa Twitter-ka ayuu Mr Trump ku yidhi: “Waxaan rabaa inaan uga mahadceliyo qof walba taageerada weyn ee aad ii fidiseen. Waxaan aadayaa cisbitaalka Walter Reed. Waxaan u maleynayaa inaan aad u fiicanahay.”

“Laakiin waxaan hubinaynaa inay wax hagaagaan. Marwada madaxweynaha aad ayay u fiican tahay. Markaa aad ayaad u mahadsan tihiin, waan idinku ku qanacsanahay, weligayna ma illaawi doono – waad mahadsan tihiin.”

Carruurta madaxweynaha, Ivanka iyo Eric, ayaa dib u soo dhigay qoraalkiisa, iyagoo ku ammaanay inuu yahay “dagaalyahan”. Ms Trump ayaa raacisay: “Waan ku jeclahay aabbe.”

Markii uu yimid Walter Reed, madaxweynaha ma uusan aadin qolka gargaarka degdegga ah si loogu daweeyo, laakiin wuxuu toos u aaday qeybta madaxtooyada ee isbitaalka, sida ay sheegayaan warbaahinta la saaxiibka ah BBC ee Mareykanka, CBS News.

BBC

Leave a Reply

Your email address will not be published. Required fields are marked *